Fréttir

Á meðan HM-mót í karlaflokki er undirbúið á fullu hérna heima er U18 ára liðið okkar statt í Taívan á HM-móti þar. Árni Geir fararstjóri hefur skrifað fréttir á facebook síðu liðsins til að halda foreldrum unganna upplýstum um hvað er í gangi. Við skellum parti af því hér á síðuna hjá okkur svona til að halda sögunni til haga.

Fimmti leikurinn í úrslitum fór fram í gærkvöld þegar Skautafélag Reykjavíkur tók á móti Skautafélagi Akureyrar. Leiknum lauk með sigri SA sem gerði sjö mörk án þess að SR-inum tækist að svara fyrir sig. Með sigrinum tryggðu Skautafélag Akureyrar sér íslandsmeistaratitilinn 2015 en liðið vann seríuna 4 - 1.

Fjórði leikurinn í úrslitakeppni karla fór fram á föstudagskvöld þegar Skautafélag Akureyrar bar sigurorð af Skautafélagi Reykjavíkur með fjórum mörkum gegn einu. Staðan í einvíginu er því 3 – 1 SA-mönnum í vil en það lið sem fyrr verður til að vinna fjóra leiki hampar titlinum. Næsti leikur er á morgun, mánudag, en þá mætast liðin í Laugardalnum og hefst sá leikur klukkan 19.00.

Þriðji leikurinn í úrslitum karla fór fram í gærkvöld en þá báru SA menn sigurorð af SR-ingum með þremur mörkum gegn einu. Með sigrinum náðu norðanmenn forystu í einvíginu en liðið hefur nú unnið tvo leiki en SR-ingar einn en það lið sem fyrr verður til að vinna fjóra leiki hampar titlinum.

Í morgun lagði landslið skipað leikmönnum 18 ára og yngri upp í langferð en liðið mun taka þátt í 3. deild HM sem fram fer í Taívan. Hópurinn flýgur í gegnum Svíþjóð og þaðan til Dubaí áður en komið er á áfangastað.

Þriðji leikur í úrslitakeppni karla fer fram í kvöld þegar Skautafélag Akureyrar og Skautafélag Reykjavíkur mætast á Akureyri og hefst leikurinn klukkan 19.30.

Skautafélag Reykjavíkur og Skautafélag Akureyrar áttus við í öðrum leik liðanna í úrslitakeppni karla. Leiknum lauk með sigri SR sem gerði fimm mörk gegn fjórum mörkum gestanna í SA. Úrslitin réðust ekki fyrr en eftir framlengingu og vítakeppni. Næst mætast liðin á Akureyri nk. fimmtudag og hefst sá leikur klukkan 19.30.

Skautafélag Reykjavíkur og Skautafélag Akureyrar mættust í fyrsta leik úrslitakeppninnar í Laugardalnum í gærkvöld. Leiknum lauk með sigri gestanna í SA sem gerðu fjögur mörk án þess að heimamenn í SR næðu að svara fyrir sig. Það lið sem verður á undan að vinna fjóra leiki hampar titlinum. Liðin mætast aftur í kvöld í Laugardalnum og hefst sá leikur klukkan 19.00