Íshokkímaður ársins 2021 - Bjarki Reyr Jóhannesson

Bjarki Reyr Jóhannesson hefur verið valinn íshokkímaður ársins 2021 af stjórn Íshokkísambands Íslands.

Bjarki Reyr hefur leikið með Skautafélagi Reykjavíkur allan sinn feril og er þar fyrirliði í meistaraflokki karla. Bjarki hefur átt fjölda marka í vetur auk stoðsendinga.  Hann er burðarásinn í öllum leikjum SR, tekur virkan þátt í öllum æfingum og er fyrirmynd margra yngri iðkenda.

Bjarki Reyr hefur átt sæti í landsliðum Íslands til fjölda ára, fyrst árið 2011 með landsliði U18 og svo í kjölfarið U20 og nú hin síðari ár hefur hann átt fast sæti í A-landsliðinu. Bjarki Reyr er þekktur fyrir vinnusemi, hann er traustur liðsfélagi og án efa einn af okkar bestu íshokkíleikmönnum fyrr og síðar.

Íshokkísamband Íslands óskar Bjarka innilega til hamingju með árangurinn.